«Kazakh Tourism» UK» AQ uıymdastyrýymen Qazaqstan týraly KBS Everywhere baǵdarlamasynyń kezekti shyǵarylymyn túsirý úshin elimizge Korean Broadcasting System (KBS) koreılik iri teleradıokorporasııasy jýrnalısteri keldi. Túsirilim toby Qazaqstanda 9 kún bolyp, sapar barysynda astanamyz Nur-Sultanǵa, sondaı-aq Býrabaı, Almaty qalasyna jáne oblysyna bardy.
KBS Everywhere atty KBS arnasynyń reıtıngti telebaǵdarlamasy týrısterdiń kózqarasy arqyly óz kórermenderin álemniń túrli bólikterinde ornalasqan eń qyzyqty qalalarmen jáne tabıǵı mekendermen tanystyrady, sondaı-aq derekti fılm formatynda sol jerdiń tarıhy, mádenıeti men dástúrleri týraly baıandaıdy.
Qazaqstandaǵy túsirilimniń basty taqyryby Naýryz meıramy boldy. 21 naýryzda túsirilim toby astanaǵa kelip, 22 naýryzda EKSPO aýmaǵyndaǵy jáne Qazaq Eli monýmentiniń aldyndaǵy alańda ornalasqan etnoaýyldardaǵy toı-dýmanǵa qatysty.
Odan keıin qonaqtar Nur-Sultan qalasy mańynda ornalasqan BEIBARYS demalys ornyna baryp, ondaǵy Naýryz dýmanyn tamashalady. Ol jerde «Kókpar» men «Qyz qýý» sııaqty ulttyq oıyndarǵa kórermen bolyp, Naýryz kójeniń dámin tatty.
Kelesi kúni túsirilim toby Visit Aqmola men «Býrabaı Damý» JShS qoldaýymen Býrabaı kýrortyna baryp, Burabayland tematıkalyq saıabaǵynda ótip jatqan merekelik baǵdarlamaǵa qatysty. Býrabaıda olar atqa minip, «Aýdaryspaq» pen «Qoı kóterý» sııaqty ulttyq jarys túrlerin de taspaǵa túsirdi.
Qonaqtar Býrabaıdyń tabıǵatyna tamsandy. Olar úsh kóldiń ádemi kórinisi ashylatyn Bólektaýdyń basyna kóterilip, áli de muz qatyp jatqan Býrabaı kóliniń ústimen Jumbaqtas pen Okjetpes taýyna deıin baryp qaıtty.
Odan keıin Koreıadan kelgen top Almatyǵa jetti. Bul jerde Visit Almaty týrıstik aqparat ortalyǵy qala men oblystyń basty kórikti jerlerine barý úshin 6 kúndik baǵdarlama uıymdastyrǵan. Bara salyp olar Esik kóli men qorǵandaryn taspaǵa jazyp, ári qaraı Sharyn shatqalyna attandy.
Keshe qonaqtar Kólsaı men Qaıyńdy kólderin túsirýge baryp, ulttyq saıabaqtyń janyndaǵy Saty aýylynda jergilikti turǵyndardyń úıine qondy.
Búgin Úlken Almaty kóli, Kóktóbe, Arbat, Medeý, Shymbulaq jáne Koreıa teatry sekildi kórikti jerlerdi túsirý josparlanǵan. Al sapardyń eń sońǵy kúni jýrnalıster Úshqońyrǵa attanbaq.
Jalpy osy sapar barysynda jýrnalıster, eń aldymen, jergilikti halyqtyń ómiri men dástúrlerine qatty qyzyǵýshylyq tanytyp, kóshelerdegi kezdeısoq adamdarmen suhbat júrgizip, sheteldik týrıstermen sóıleskenin aıta ketý kerek.
Nátıjesinde KBS telearnasynda 50 mınýttyq baǵdarlamanyń kórsetilimi aǵymdaǵy jyldyń 4 mamyryna saǵat 09.40-qa josparlanǵan. Buǵan qosa, teleradıokorporasııanyń málimeti boıynsha, baǵdarlama basqa da koreı telearnalarynda kórsetiletin bolady.
Taǵy da bir atap ótetin jaıt, KBS túsirilim tobyn elimizge Naýryz meıramyn túsirý úshin shaqyrý – QR Koreıa Respýblıkasyndaǵy Elshiliginiń bastamasy.